لما العالم بغلي… كيف نحافظ على بيتنا دافي؟

بقلم: أمينة عبد القادر – مستشارة اقتصاد العائلة واستثمار، ماستر NLP

في الأيام الأخيرة، الأخبار كلها بتحكي عن أزمات اقتصادية، توترات بين الدول، ضرائب جديدة، وغلاء.

يمكن تشوفيها أخبار بعيدة… سياسات، حكومات، …بس الحقيقة؟

الضربة بتوصل لعيلتك، لمحفظتك، لسعر الخبز والبندورة، قبل ما توصل للنشرات.

كل مرة دولة بترفع جمارك، أو دولة ترد بالعقوبات…الأسعار بتغلي، السوق بتلخبط، والراتب؟ بيضل نفسه… بس بكفي أقل.

لما العالم يغلي،إحنا بنحس فيها من أول رفّ في السوبرماركت،من أول فاتورة بتوصل،ومن أول "لا" من ابنك لما ما تقدر تجيبي له اللي كان يطلبه بسهولة قبل.

بس شو نعمل؟نقعد نشتكي؟ولا نجهّز حالنا؟

أنا بآمن إن البيت الواعي، هو اللي بعرف يتعامل مع الظروف، مش يهرب منها.

عشان هيك، لما الاقتصاد يتوتر…نحنّ نهدأ

نراجع مصروفنا. نرجّع الأولويات على الطاولة.نتذكّر إنه الكمال مش لازم. وإنه الأمان أهم من المظاهر.

كيف نحمي بيوتنا؟

– ما نستهين بالمصروف الصغير… هو اللي بيخرّب الميزانية.

– نستثمر بذكاء، مش بخوف.

– نعلّم أولادنا من هسه… كيف يصيروا جزء من الحل، مش عبء جديد.

– نقعد سوا… نحكي، نخطط، نكون فريق واحد، مش أفراد بتقاتل الظروف لحالهم.

اللي بصير بالعالم مش بإيدك، بس كيف تديري بيتك؟ هون قوتك.

ابدأي بخطوة بسيطة… ورقة، حسبة، نية جديدة.

وبذكّرك:مش لازم تكوني خبيرة اقتصاد…بس لازم تكوني قائدة بيتك.بعقل، بقلب، وبوعي.